வானம் தொடாத
சிறகொன்று -
காற்றில் அலைந்து அலைந்து திரிந்ததில்
வெளியில் தெரியாத -
நிறைய முகங்கள்
வந்து வந்து களைகின்றன!
-------------------------------------------------------

எங்கோ ஒரு
சாவு மேளத்தின் சப்தம்
தொலைவிலிருந்து -
கேட்டுக் கொண்டு தானிருக்கிறது
நிறைய அழுகுரல்களையும்
மரணத்தின் வாசத்தையும்
விழுங்கிவிட்டு!
-------------------------------------------------------

என் -
கழுத்திலிருக்கும்
தங்க சங்கிலியும்
கைவிரல் மோதிரமும் காப்பும்
எத்தனையோ ஏழை பெண்களுக்கு
கிடைக்காத தாலியை -
நினைவுபடுத்தாமலில்லை!
-------------------------------------------------------

நிறைய வீடுகளில்
மின்விளக்கும்
மின்விசிறியும்
வெட்டியாய் எரிந்துக் கொண்டும்
இயங்கிக் கொண்டும் தானிருக்கிறது
வேறுசில வீட்டின் -
வெளிச்சத்தைத் திருடிக்கொண்டு!
-------------------------------------------------------

சரியில்லை எனத் தெரிந்தும்
அறுத்தெறிய மறுக்கிறது
பல மடமைகளை -
என் மூதாதையர் வளர்த்த
புத்தி!
-------------------------------------------------------

காசு கொடுத்து
வாங்க இயலாத
பொருள்களிலிருந்து தான்
பூக்கிறது கனவு -
வாங்கிய பொருள்களின் ஆசை தீர்ந்த
சலிப்பிற்கிடையேயும்!
-------------------------------------------------------

இன்னும் -
நிறைய மண்
மாளிகையாகாமலும்,

நிறைய துணிகள்
நெய்யப் படாமலும்,

மனிதர்கள் -
நிறையப் பேர்
பக்குவப் படாமலும் தான்
சுற்றுகிறது பூமி!
-------------------------------------------------------

கால நேர
சம்பிரதாயம் பார்பவர்கள்
வீட்டிலும் -
பிணங்கள் விழாமலில்லை!

-------------------------------------------------------

 

நன்றி