என் எழுதுகோலை
பிடுங்கிக் கொள்வதாய்
எதிரே நின்று -
நிறைய பறவைகள் கத்துகின்றன;

என்னை பற்றியும்
எழுது - என்கின்றனவா,
என்னிடம் -
பாடம் கேள் என்கின்றனவா
புரியவில்லை!
----------------------------------------
மரமும் -
செடியுமென் ஜாதியென
நினைக்கும் நான் -
தெருவில் ஆங்காங்கே
பட்டுப் போகும் -மரத்திற்கான சோகத்தை
ஏனென்று கேட்பதேயில்லை!
----------------------------------------

மனிதனை மனிதன்
வெட்டினால் -
தெருவில் போகும்
நாய் கூட குறைக்கிறது;

எதிர் வீட்டிலிருப்பவன் -
மரங்களை வெட்டினான்.

ஒன்றை கூட என்னால்
தடுக்க முடியவில்லை!
----------------------------------------

பூக்கள் ஆயிரம்
பூக்கின்றன;
ஒருசில பூக்களே
நுகரப் படுகின்றன!
-----------------------------------------

மனிதன் -
நினைத்துக் கொண்டான்
அவன் தலைக்குச் சூடிய
பூவும்,
பூஜைக்கு வைத்த மலர்களும்
பேருகொண்டதாய்;

பூக்கள் -
நினைத்துக் கொண்டன
மனிதன் பறித்த பூவும்
கிள்ளி -
மாலையில் தொடுத்த மலர்களும்
இறந்துப் போனதாய்!
-----------------------------------------

நன்றி